受疫情影響，dance studio同gym全部閂門，由於我怕成日留係屋企會暴肥，所以七月開始我決定嘗試輕斷食。#輕斷食就係我七月新增小習慣
我實行嘅係16:8，即係一日有16個鐘斷食，剩返嘅8個鐘就係進食窗口。實行之前做咗啲research，支持派指出斷食可減低胰島素增加消耗，反對派當然質疑安全性。我本身唔係靠身材搵食絕對唔會為咗瘦身而搵命博，純粹係唔想疫情之後減得咁辛苦，所以就貪得意即管試吓，估唔到最後有所感受😂 #唔鼓吹大家亂試
2018年尾我發現左眼眼角有一粒飄浮物，診斷後證實係玻璃體退化飛蚊症。然後一個月後右眼亦同時出現。我哋成日口口聲聲話自己老，或多或少都本着自嘲嘅心態，但當有病纏身，我感覺離真正嘅老，唔係近，而係present tense正在發生。最精神崩潰嘅係飛蚊唔會好番，你每一日擘大眼就會見到佢哋，好似無時無刻都提住你正在退化，心情難免無助沮喪，但歲月教曉我什麼？就係面對不可逆之事，要轉念，要樂觀尋求共存。
讀過一段文字大概是這樣：症狀係你身體發出嘅求救訊號，你要嘗試聆聽自己嘅身體。我懂聆聽自己心靈，但係身體又好似不懂！就算呢一年眼乾滴下眼藥水，唔要太黑睇電視，電話睇得耐就放低一下...我都仍然唔覺得正在溝通同身體溝通...直到最近斷食竟然令我unlock咗啲嘢。
我係一個慣性食早餐嘅人，要我第一餐兩點先開始食開頭我有啲搞唔掂，而然，每當我感受到肚餓嘅時候，我會好真切咁問自己：我係咪真係肚餓？然後好真切咁感受自己係咪真係肚餓，而當我重複佢做呢個練習我發現其實有啲肚餓係假性、係心理、係情緒、係習慣，因為我食開早餐，所以覺得朝頭早一起身就要食早餐，至於身體係咪真係需要呢啲熱量原來我從無諗過...突然茅塞頓開。
呢種頓悟令我諗起自愛嘅重要性。
你覺得30歲前要結婚生仔，所以仍然單身覺得好失敗；你覺得唔會遇到更好嘅人，所以就算佢對你唔好都要繼續留低...其實全部野都係你覺得，全部野都係我哋腦袋作祟，自己用情緒去牽動情感，根本就無體諒過自己嘅內心感受，正如你明知stalk前度IG係低級錯誤，為咗滿足自己慾望又忍唔住睇，睇完又要唔開心，根本就係清醒地望住自己沉淪，一刀一刀自己捅自己，所以成日話唔開心係自己攞嚟呢句話係無錯。下次當你又想做一個衝動嘅決定之前，花多啲時間理智地去探究清楚自己嘅感受同需要，就好似我斷食一樣，問清楚究竟我係咪真係需要食呢一口蛋糕，當你自律又理智，心臟夠強大，我相信人生同磅數都會輕好多。
面對複雜嘅感情世界，”我已飽”(拒絕)係一種處世態度，一種自愛境界。至於我有無真係瘦到？無做過任何運動，係咁嘅環境之下我仍然能夠保持體重無增磅算係咁，仲想點？#廢腑之鹽
#為自己而活
#女人像鹽
同我講聲生日快樂：
Instagram.com/missyboni
Search